Изворите на реката Бабуна: Секој кој ги посетил споделува

За сите љубители на шумата и зеленилото, ви ја препорачуваме еднодневната предлог дестинација „Изворите на Бабуна“. Се наоѓаат во пазувите на планината Јакупица, во областа наречена Азот. Овие фотографии се направени од професионалиот фотограф Дуле Дамјановски кој ги сподели во групата за патување низ Македонија.

До нив се стига по патеката која на самиот почеток има и информативна табла на која стои и јасно предупредување, „Пешачењето кон изворите да не се изведува во зима, доцна есен и рана пролет“. Планината Јакупица, каде се наоѓаат изворите на Бабуна, е речиси недопрена од човекот.

Тие што сепак ќе се решат да ги видат и да се напијат вода од изворите, треба да се подготват за неколкучасовно пешачење. Патот почнува од рибникот кај селото Нежилово, во месноста Азот.

Многу се прашуваат како да стигнат до таму. Игор Смилев од ЗГ Грин пауер објаснува:
Од село Нежилово се упатувате по земјениот пат кон ПД Чеплес. По 3км одење се скршува десно, има табла на која пишува водопадите на Бабуна. Патеката е маркирана, но треба да се внимава оти таа е лизгава и тесна. Се следи маркацијата, се оди внимателно и ќе го донесе секој заинтересиран до водопадите а малку погоре до изворите на Бабуна, кои се под Солунска глава.