Наместо факултет се одлучив да отворам сопствена фарма во Ранковце

Понекогаш и кратките патувачки приказни може да променат многу мислења. Ние сме тим кој сака да го промени начинот на кој повеќето размислуваме во врска со нашите патувања. Наша цел е да опфатиме што е можно повеќе локални луѓе од целиот Балкан кои прават мали нешта од огромно значење за туризмот.

Денеска ве запознаваме со уште еден наш локален херој чија приказна и не е баш така мала.

Запознајте го Денис Бојковски. Млад фармер кој расте и живее во селото Станча, општина Ранковце. За оние кои не не слушнале за Станча, ова село се наоѓа под планината Герман на одлична надморска височина која е идеална за спортување во природа и активен одмор.

Денис го поминал својот живот во ова село. Како дете расте опкружен со животни. Неговите родители одгледувале крави, овци, свињи и коњи. Тој вели дека отсекогаш имале еден или два коња.

Со завршувањето на средно училиште Денис, размислувал дали да продолжи на факултет или да отвори своја фарма на село. Љубовта кон животните му помогнала да ја одбере втората опција и да започне со одгледување крави и коњи. Сам инвестира и сам го купува стадото кое на почетокот било мало. Парите кои ги инвестира ги заработил самиот со претходно работење на друго место.

По одреден период Денис се поврзува со уште еден одгледувач на крави, коњи и свињи. Денеска тие имаат заедничка фарма каде преработуваат млеко и млечни производи.

За да одгледувате животни најважно е да имате љубов кон нив, вели Денис и додава дека самите животни ќе ве научат како да постапувате кон нив. Животните се одлгедуваат во неговото село кое се наоѓа на 1.100 метри надморска височина. За Денис оваа е чиста природа и божја убавина. Бидејќи се работи за рурално место, одгледувањето на животни е многу полесно. Неговите потрошувачи се воодушевени кога ќе слушнат каде се одгледува стоката, а особено кога ќе ја посетат ова природна убавина. Самите се уверуваат дека производите се како за своја душа, вели Денис.

Според Денис, овој регион може да понуди многу здрава храна. Има многу работи кои треба да се средат за да функционира се беспрекорно, но и засега нема некои потешкотии во работењето.

Трите добри страни од ова професија се слободата, мирот и спокојот. Има доста обврски кои треба да ги извршува, но вели дека ако се работи со љубов, на крајот на денот се си завршува добро.

Неговата фарма одгледува телиња, јариња и прасиња. Произведуваат козјо сирење на традиционален начин. Собираат и преработуваат Вргањ во тегли. Произведуваат месо во тегли, а печат и домашна ракија од сливи кои во регионот ги има во изобилие.

Денис се бави и со земјоделство. Сади компир кој не се третира со пестициди, туку исклучиво со арско ѓубриво кое го има во големи количини од животните.

Тој е расположен за соработка. Вели дека сите заинтересирани може да го контактираат на фејсбук страницата „Zdrava hrana- dolg zivot“ каде има фотографии од животните. Исто така има креирано инстаграм профил @ubavinite_na_stancha.

Ги поканува сите да ја посетат неговата фарма. Вели дека прошетката со коњи и пикник во природа кои тој ќе им ги организира ќе им помогнат во ослободувањето од стресот.

Како јаготка на шлагот, пикникот најчесто го организира покрај река со храна која самиот ја произведува.

Ни значат вашите коментари, споделете ги под приказната.